Ոչ եւս է Կարդինալ Ժորժ Քոթթիէ` Քահանայապետական Տան երբեմնի Աստուածաբան։

(Ռատիօ Վատիկան) Հինգշաբթի` 31 մարտ 2016-ին, Հռոմի Ակոսթինօ Ճեմելլի հիւանդանոցի մէջ, 93 տարեկանին, իր մահկանացուն կնքեց` Կարդինալ Ժորժ Մարի Մարթէն Քոթթիէ, Քահանայապետական Տան երբեմնի Աստուածաբան։

Ան ծնած էր 25 Ապրիլ 1922-ին Զուիցերիոյ Ժընեւ քաղաքին  մէջ։ 1945-ին կ՛անդամակցի Տոմենիքեան միաբանութեան ապա քահանայ կը ձեռնադրուի 1951-ի Յուլիս 2-ին, ու կը լուծուի դաստիարակութեան մարզին։

1986-ին կ՛անուանուի անդամ` Աստուածաբանական միջազգային յանձնախումբին եւ 1989-ին կը դառնայ յանձնախումբի քարտուղար։ 1990-ին երջանկայիշատակ Սուրբ Յովհաննէս Պօղոս Բ քահանայապետը զինք կ՛անուանէ Քահանայապետական Տան Աստուածաբան։

Կարդինալական աստիճանը ստացաւ սուրբ Յովհաննէս Պօղոս Բ Քահանայապետի օրով` 21 հոկտեմբեր 2003-ին։

Յուղարկաւորութեան արարողութիւնը նախատեսուած է շաբաթ` 2 ապրիլ 2016-ին առաւօտեան 8,30-ին, Սուրբ Պետրոսի պազիլիքային մէջ, Կարդինալ Անճելօ Սոտանոյի նախագահութեամբ։

Կարդինալ Քոթթիէի մահուամբ Կարդինալական դասի ընդհանուր թիւը կ՛իջնէ 215-ի  որոնցմէ 116-ը Քահանայապետ ընտրելու իրաւունքով կարդինալներ իսկ մնացած 99-ն ոչ ընտրող կարդինալներ։

Յայտնենք թէ Զուիցերիան առ այժմ ունի 3 կարդինալներ` մէկը ընտրելու իրաւունքով եւ միւս երկուքը` ոչ ընտրող։ Իսկ Տոմինիքեան միաբանութեան անդամ կարդինալները երկու հոգի են։